پاکستانیوں نے تاریخ رقم کر دی! مارچ میں 4 ارب ڈالر کی ترسیلات کا ریکارڈ قائم

کراچی ( کامرس ڈیسک)بیرون ملک مقیم پاکستانیوں نے رواں سال مارچ کے مہینے میں تاریخی مالیت کی ترسیلات وطن بھیج کر نیا ریکارڈ قائم کر دیا ہے۔ اسٹیٹ بینک کے مطابق کسی ایک ماہ میں 4 ارب ڈالر سے زائد کی ترسیلات کا یہ سب سے بڑا ریکارڈ ہے۔ مارچ 2025 میں بیرون ملک مقیم پاکستانیوں سے 4.1 ارب ڈالر کی ترسیلات موصول ہوئیں، جو ایک نیا سنگ میل ہے۔اس شاندار کارکردگی میں مارچ 2024 کے مقابلے میں ترسیلات میں 37.3 فیصد اور فروری 2025 کے مقابلے میں 29.8 فیصد کا اضافہ دیکھنے کو ملا۔رواں مالی سال جولائی تا مارچ کے دوران مجموعی طور پر 28 ارب ڈالر کی ترسیلات وطن موصول ہو چکیں، جبکہ گزشتہ مالی سال کے اسی عرصے میں 21 ارب ڈالر کی ترسیلات آئی تھیں۔مارچ 2025 میں سعودی عرب سے 98 کروڑ 37 لاکھ ڈالر، متحدہ عرب امارات سے 84 کروڑ 21 لاکھ ڈالر، برطانیہ سے 68 کروڑ 39 لاکھ ڈالر اور امریکا سے 41 کروڑ 95 لاکھ ڈالر کی ترسیلات موصول ہوئیں۔