ایف بی آر نے سیلز ٹیکس وصولی کے لیے چینی کی کم از کم قیمت مقرر کر دی

اسلام آباد( کامرس ڈیسک)فیڈرل بورڈ آف ریونیو (ایف بی آر) نے مقامی سطح پر تیار ہونے والی چینی کی کم از کم قیمت مقرر کرنے کے لیے ایک نوٹیفکیشن جاری کیا ہے، جس کے مطابق چینی کی قیمت ہر 15 دن بعد چیک کرکے نئی قیمت متعین کی جائے گی۔ایف بی آر کی جانب سے جاری کردہ نوٹیفکیشن کے مطابق، پاکستان شماریات بیورو کی رپورٹ میں درج چینی کی قیمت میں سے 16 روپے فی کلو گرام کم کرکے سیلز ٹیکس وصولی کے لیے ایکس مل قیمت مقرر کی جائے گی۔ یہ قیمت ہر 15 دن بعد پاکستان بیورو آف شماریات کی ویب سائٹ پر شائع کردہ قیمت سے متعارف کرائی جائے گی اور اسی بنیاد پر سیلز ٹیکس وصولی کی جائے گی۔یاد رہے کہ وفاقی حکومت نے چینی کی قیمت کے تعین کے لیے ایک کمیٹی بھی قائم کی ہے جو اس حوالے سے کام کر رہی ہے۔ اس اقدام کا مقصد چینی کے نرخوں میں استحکام لانا اور سیلز ٹیکس وصولی کے عمل کو منظم کرنا ہے۔