نہر میں رکشہ گرنے کے واقعے میں جاں بحق تمام افراد کی لاشیں نکالنے کا آپریشن مکمل

پشاور( اباسین خبر)صوابی کے علاقے گوہاٹی نہر میں رکشہ گرنے کے افسوسناک واقعے میں جاں بحق ہونے والے تمام افراد کی لاشیں نکالنے کا ریسکیو آپریشن مکمل کر لیا گیا۔ریسکیو حکام کے مطابق، آخری ڈوبنے والے بچے کی لاش نکالنے کے بعد سرچ آپریشن کا اختتام ہوا۔ یہ دل دہلا دینے والا واقعہ اس وقت پیش آیا جب باکر کے مقام پر ایک تیز رفتار ٹریکٹر ٹرالی رکشہ سے ٹکرا گئی، جس کے نتیجے میں رکشہ نہر میں جا گرا۔رکشے میں سوار افراد کا تعلق ایک ہی خاندان سے تھا اور ان میں خواتین اور بچے بھی شامل تھے۔ مجموعی طور پر 14 افراد نہر میں ڈوب گئے، جن میں سے مقامی افراد اور ریسکیو کی غوطہ خور ٹیموں نے 8 افراد کو زندہ نکال لیا، جبکہ 6 افراد جاں بحق ہو گئے۔ جاں بحق ہونے والوں میں تین خواتین، دو بچے اور ایک بچی شامل ہیں۔ریسکیو ٹیموں کی انتھک محنت اور مقامی افراد کے تعاون سے تمام لاشیں نکال لی گئیں، جس کے بعد ریسکیو آپریشن مکمل کر دیا گیا ہے۔ اس افسوسناک واقعے نے علاقے میں کہرام مچادیا اور ہر آنکھ اشکبار ہے۔