اختیار ولی نے عمران خان کی رہائی سے مائنز اینڈ منرل بل کو مشروط کرنے کو مذموم عزائم قرار دے دیا

پشاور( اباسین خبر)وزیراعظم شہباز شریف کے کوآرڈی نیٹر برائے خیبرپختونخوا امور اختیارولی نے کہا ہے کہ مائنز اینڈ منرل بل کو پاکستان تحریک انصاف (پی ٹی آئی) کے بانی عمران خان کی رہائی سے مشروط کرنا ایک مذموم عزائم کو ظاہر کرتا ہے۔اپنے بیان میں اختیارولی کا کہنا تھا کہ خیبرپختونخوا میں قدرتی وسائل میں کرپشن کے حوالے سے ایک وائٹ پیپر جاری کیا جائے گا اور یہ تفصیل سے بتایا جائے گا کہ خیبرپختونخوا میں کون کس طرح مال بنا رہا ہے۔انہوں نے مزید کہا کہ پی ٹی آئی نے ہمیشہ عوام دشمن پالیسیوں کو فروغ دیا ہے اور پی ٹی آئی والے چاہتے ہیں کہ ملک میں انتشار ہو اور پاکستان دیوالیہ ہو جائے۔ تاہم، انہوں نے واضح کیا کہ ملکی وحدت کو نقصان پہنچانے کی کوئی بھی کوشش کامیاب نہیں ہونے دی جائے گی۔اختیارولی نے اس بات پر زور دیا کہ مائنز اینڈ منرل بل کو عمران خان کی رہائی سے مشروط کرنا ایک غیر مناسب کوشش ہے، جو کبھی کامیاب نہیں ہونے دی جائے گی۔ ان کا کہنا تھا کہ بانی پی ٹی آئی اور ان کے حواریوں نے ہمیشہ بلیک میلنگ کی سیاست کی، اور خیبرپختونخوا حکومت کو عوام دشمن پالیسیوں کو ترک کرنا ہوگا۔