جدہ ( مانیٹرنگ ڈیسک)سعودی حکومت نے رواں حج سیزن کے دوران پاکستان سمیت 14 ممالک کے عمرہ، کاروباری اور فیملی ویزوں پر پابندی عائد کرنے کا اعلان کیا ہے۔ سعودی وزارت خارجہ کے مطابق یہ پابندی بھارت، بنگلادیش، مصر، انڈونیشیا، عراق، نائیجیریا، اردن، الجزائر، سوڈان، ایتھوپیا، تیونس، یمن اور پاکستان پر عائد کی گئی ہے۔بیان میں کہا گیا کہ حج سیزن کے دوران ان ممالک کو عمرہ، بزنس اور فیملی ویزے جاری نہیں کیے جائیں گے اور یہ پابندی جون کے وسط تک برقرار رہے گی۔ تاہم، سفارتی ویزے، اقامتی اجازت نامے اور حج سے متعلق مخصوص ویزے استثنی حاصل کریں گے۔سعودی وزارت نے یہ بھی ہدایت کی ہے کہ پابندی کے شکار ممالک سے عمرہ ویزے پر سعودی عرب آنے والے افراد کو ماہ کے آخر تک اپنے وطن واپس جانا ہوگا۔ اس کے علاوہ، ان ممالک سے عمرہ ویزا پر آنے کی آخری تاریخ 13 اپریل مقرر کی گئی ہے۔نئے ضوابط کے تحت اگر ان ممالک کے شہری مہلت کے بعد سعودی عرب میں موجود پائے گئے تو انہیں پانچ سال کی سفری پابندی کا سامنا کرنا پڑ سکتا ہے۔وزارت حج و عمرہ نے وضاحت کی ہے کہ یہ اقدام حج کے عمل کو محفوظ اور بہتر طریقے سے منظم کرنے کے لیے کیا گیا ہے۔ حج 2025 کا سیزن 4 جون سے 9 جون تک مقرر کیا گیا ہے۔
سعودی عرب کا بڑا فیصلہ، پاکستان سمیت14 ممالک کے عمرہ، بزنس ویزوں پر پابندی
13
