ہمارے ملک میں لاشوں پر بھی سیاست کی جاتی ہے: عظمی بخاری

لاہور( اباسین خبر)وزیرِ اطلاعات پنجاب عظمی بخاری نے کہا ہے کہ افسوس کی بات ہے کہ ہمارے ملک میں لاشوں پر بھی سیاست کی جاتی ہے۔عظمی بخاری نے کہا کہ وزیرِ اعلی پنجاب اربوں روپے دواں کی مد میں دے رہی ہیں، لیکن انہیں ہی الزام دیا جاتا ہے کہ وہ اسپتالوں کی تشہیر کے لیے جاتی ہیں۔ انہوں نے کہا کہ یہ آپ کے لیڈر کا دور نہیں ہے، یہ مریم نواز کا دور ہے۔انہوں نے مزید کہا کہ ایم ایس میو اسپتال نے بہت غلط طریقے سے بات کی اور ٹھیک سے جواب نہیں دیا۔ عظمی بخاری نے کہا کہ ایم ایس سے متعلق کہا جا رہا ہے کہ ادویات اور فنڈ کی کمی کے باعث استعفی دیا گیا، لیکن میو اسپتال میں دواوں کے فنڈز موجود تھے، پھر دوائیں باہر سے کیوں منگوائی جا رہی تھیں؟وزیرِ اطلاعات پنجاب نے کہا کہ ہمارے پاس فرض شناس ڈاکٹرز بھی موجود ہیں، جو روزے میں بھی اپنے فرائض سرانجام دے رہے ہیں۔ میو اسپتال میں مسیحائی کی کمی تھی جو وہاں ہونی چاہیے تھی۔عظمی بخاری نے کہا کہ ڈاکٹرز اور انتظامیہ کا کام ہے کہ جو پیسے ملے ان کی ذمہ داری پوری کریں، اور ہر واقعے کا جواب مریم نواز سے کیوں مانگا جاتا ہے؟انہوں نے مزید کہا کہ وزیرِ اعلی کو صرف نہیں، بلکہ جس کو بھی ذمے داری ملی ہے، ان سب کو اللہ کے سامنے جواب دہی کرنی ہو گی۔ میو اسپتال کے معاملے میں انسانی غلطی نظر آ رہی ہے، انجکشن کا محلول بنانے میں غلطی ہوئی۔عظمی بخاری نے سوال کیا کہ اگر اسپتال انتظامیہ فنڈز استعمال نہیں کر رہی تو اس کی غلطی کس کی ہے؟ اگر فنڈز استعمال نہیں ہو رہے تو ایم ایس کو کیوں نہیں پوچھا جا رہا؟انہوں نے کہا کہ کچھ شعبوں کو ہڑتالیں، جلوس اور پروپیگنڈا زیب نہیں دیتا، جبکہ وزیرِ اعلی خود اسپتالوں میں جا کر لوگوں سے ملاقات کرتی ہیں۔عظمی بخاری نے یہ بھی کہا کہ مریم نواز خود اسپتالوں میں دواوں کا ریکارڈ چیک کرتی ہیں، اور جب لوگوں کو گھروں میں دوائیں مل رہی ہیں تو وہ کیسے مطمئن نہیں ہو سکتے۔