پیکا قانون میں ترامیم کا مقصد اپنے سیاہ کارناموں کو میڈیا سے چھپانا ہے: بیرسٹر سیف

پشاور( اباسین خبر)مشیر اطلاعات خیبر پختونخوا بیرسٹر ڈاکٹر سیف نے پیکا قانون میں ترامیم پر شدید تنقید کرتے ہوئے کہا کہ ان ترامیم کا مقصد اپنے سیاہ کارناموں کو میڈیا سے چھپانا ہے۔ انہوں نے کہا کہ پیکا ایکٹ میں ترامیم آزادی صحافت پر حملہ اور میڈیا کی آزادی کو سلب کرنے کی کوشش ہے۔بیرسٹر سیف نے مزید کہا کہ یہ ترامیم درحقیقت ایک “ڈیجیٹل نیشن برباد پاکستان بل” ہیں، جن کی وہ بھرپور مذمت کرتے ہیں۔ ان کا کہنا تھا کہ جعلی حکومت نے مختلف کالے قوانین کے ذریعے ذرائع ابلاغ کی آزادی کو پامال کیا ہے اور اب پیکا ایکٹ میں ترامیم کے ذریعے آزادی صحافت کو بھی محدود کیا گیا ہے۔انہوں نے اس بات پر زور دیا کہ یہ ترامیم اقتدار کی دوام کے لیے کی جا رہی ہیں اور ان کے خلاف پی ٹی آئی صحافی برادری کے ساتھ شانہ بشانہ کھڑی ہے۔ بیرسٹر سیف نے کہا کہ اس حکومت میں کوئی ادارہ ایسا نہیں بچا جسے تباہ نہ کیا گیا ہو، اور ایسی سخت پابندیاں بدترین آمریت میں بھی نہیں دیکھی گئیں۔