عارف علوی کا مذاکرات کی حمایت کا اعلان، بلوچستان کا مسئلہ بھی مذاکرات سے حل ہوگا: سا بق صدر

کراچی ( اباسین خبر)پاکستان تحریک انصاف کے رہنما عارف علوی نے آئندہ انتخابات کے حوالے سے مذاکرات کی حمایت کر دی ہے۔ دورہ امریکہ کے دوران سی این این کو انٹرویو دیتے ہوئے انہوں نے کہا کہ اگر آئندہ انتخابات اور جمہوریت کے قیام کے لیے مذاکرات ہوتے ہیں تو پی ٹی آئی انہیں خوش آمدید کہے گی۔ بانی پی ٹی آئی عمران خان نے بھی ملک کے مفاد میں مذاکرات کی حمایت کی ہے۔عارف علوی نے اس بات پر زور دیا کہ پاکستان میں ہونے والے احتجاجات کو طاقت کے زور پر روکا جا رہا ہے، اور کہا کہ ملک کے پرنٹ، الیکٹرانک اور سوشل میڈیا اس وقت آزاد نہیں ہیں جس کے باعث عوام میں مایوسی بڑھ رہی ہے۔ ان کا کہنا تھا کہ بلوچستان کے نوجوان مایوس ہیں کیونکہ ان کی آواز نہیں سنی جا رہی، اور بلوچستان کے مسئلے کا حل بھی مذاکرات میں ہی ہے۔پی ٹی آئی کے رہنما نے مزید کہا کہ 8 فروری کے انتخابات میں پی ٹی آئی بلوچستان سے جیتی تھی، مگر ووٹ کم گنے گئے، اگر ووٹ درست طور پر شمار کیے جاتے تو بلوچستان سمیت تمام صوبوں میں پی ٹی آئی کی حکومت ہوتی۔یاد رہے کہ گزشتہ روز پی ٹی آئی کے رہنما اعظم سواتی نے بھی مذاکرات کے حوالے سے پیشرفت کی امید ظاہر کی تھی اور کہا تھا کہ وہ عارف علوی کے ملک واپس آنے کا انتظار کر رہے ہیں۔ اعظم سواتی نے یہ بھی کہا کہ پی ٹی آئی کے بانی عمران خان لوگوں کے دلوں پر راج کرتے ہیں اور ان کی محبت سے ہر بچہ آشنا ہے۔عمران خان نے آنے والی نسلوں کے لیے بات چیت پر رضامندی کا اظہار کیا تھا، اور وزیراعلی خیبر پختونخوا علی امین گنڈا پور کی موجودہ سرگرمیوں کو بھی سراہا۔ اعظم سواتی نے مزید کہا کہ یہ سیاسی مقدمہ 11 سال سے چل رہا ہے، اور جب تک ملک میں انسانی حقوق معطل ہوں گے، ملک ترقی نہیں کر سکتا۔