سانحہ 9 مئی کے 3 مقدمات میں 19 اپریل کو فرد جرم عائد ہوگی، 10 مقدمات میں پولیس چالان پیش کرنے میں ناکام

راولپنڈی ( اباسین خبر)سانحہ 9 مئی کے 3 مقدمات میں 19 اپریل کو ملزمان پر فرد جرم عائد کی جائے گی، جب کہ دیگر 10 مقدمات میں پولیس چالان عدالت میں پیش نہیں کر سکی۔ ایکسپریس نیوز کے مطابق، یہ سماعت انسدادِ دہشت گردی کی خصوصی عدالت کے جج امجد علی شاہ کی سربراہی میں ہوئی، جس میں وکلائے صفائی اور پراسیکیوٹر بھی عدالت میں موجود تھے۔اس سماعت کے دوران، میجر طاہر صادق، واثق قیوم، صداقت عباسی، اپوزیشن لیڈر عمر ایوب، بابر اعوان اور سابق وزیر داخلہ شیخ رشید سمیت دیگر ملزمان عدالت میں پہنچے۔ پولیس نے مختلف تھانوں میں درج مقدمات کے چالان کی کاپیاں اور ریکارڈ عدالت میں پہنچا کر ملزمان میں تقسیم کیا۔عدالت نے سانحہ 9 مئی کے 13 مقدمات کی سماعت 19 اپریل تک ملتوی کر دی، جن میں 3 مقدمات میں فرد جرم عائد کی جائے گی، جبکہ 10 مقدمات کے چالان پیش نہیں کیے جا سکے۔عدالت نے پولیس کی کارکردگی پر سخت برہمی کا اظہار کرتے ہوئے کہا کہ ڈیڑھ سال گزرنے کے باوجود 10 تھانوں کی پولیس چالان پیش کرنے میں ناکام رہی ہے۔ ان مقدمات میں جی ایچ کیو گیٹ 4 پر حملہ، آرمی میوزیم حملہ، اور صدر میں حساس بلڈنگ جلانے کے مقدمات شامل ہیں۔ عدالت نے پولیس کو سختی سے ہدایت کی کہ آئندہ سماعت پر ان کیسز کے چالان پیش کیے جائیں۔