ملتان سلطانز کی شاندار فتح، کوئٹہ کو بآسانی زیر کر لیا

لاہور ( سپورٹس ڈیسک)لاہور میں کھیلے گئے دلچسپ مقابلے میں ملتان سلطانز نے عمدہ کارکردگی کا مظاہرہ کرتے ہوئے کوئٹہ گلیڈی ایٹرز کو چھ وکٹوں سے شکست دے دی۔قذافی اسٹیڈیم میں ہونے والے میچ میں ملتان کے کپتان نے ٹاس جیت کر حریف ٹیم کو پہلے بیٹنگ کی دعوت دی۔ کوئٹہ گلیڈی ایٹرز نے مقررہ اوورز میں سات وکٹوں کے نقصان پر ایک سو چھیاسٹھ رنز بنائے۔کپتان سعود شکیل نے ذمہ دارانہ کھیل پیش کرتے ہوئے چھپن رنز اسکور کیے جبکہ بیوون جیکبز نے ناقابل شکست انچاس رنز بنا کر ٹیم کے مجموعے کو مضبوط بنایا۔ احمد دانیال بائیس رنز بنانے کے بعد زخمی ہو کر میدان چھوڑ گئے۔ملتان سلطانز کی جانب سے محمد نواز نے شاندار بولنگ کرتے ہوئے تین کھلاڑیوں کو آؤٹ کیا جبکہ عرفات منہاس نے دو وکٹیں حاصل کیں۔ہدف کے تعاقب میں ملتان سلطانز نے پراعتماد بیٹنگ کا مظاہرہ کرتے ہوئے چار وکٹوں کے نقصان پر مطلوبہ ہدف حاصل کر لیا۔ شان مسعود نے چھیالیس اور صاحبزادہ فرحان نے بتیس رنز بنائے جبکہ اسٹیو اسمتھ ترپن رنز کے ساتھ نمایاں رہے۔کوئٹہ گلیڈی ایٹرز کی جانب سے حسن نواز نے دو وکٹیں حاصل کیں تاہم دیگر بولرز حریف ٹیم کو روکنے میں ناکام رہے۔