دبئی کو مطلوب ملزم حارث محمود کے معاملے پر ریکارڈ طلب

پشاور( اباسین خبر)پشاور ہائی کورٹ نے دبئی کو مطلوب ملزم حارث محمود کے حوالے سے جیل انتظامیہ اور ایف آئی اے کو ریکارڈ پیش کرنے کا حکم دیا ہے۔ کیس کی سماعت قائم مقام چیف جسٹس ایس ایم عتیق شاہ اور جسٹس صاحبزادہ اسد اللہ نے کی، جس میں ملزم کی والدہ کی درخواست پر تفصیل سے غور کیا گیا۔عدالتی معاون بیرسٹر عامر نے عدالت کو بتایا کہ ملزم حارث محمود کے خلاف گرین نوٹس جاری کیا گیا تھا، جس کے تحت پولیس نے ملزم کو گرفتار کر کے جوڈیشل مجسٹریٹ کے سامنے پیش کیا، بعد ازاں ملزم کو جیل بھیج دیا گیا۔ انہوں نے مزید بتایا کہ گرین نوٹس میں صرف ملزم کی تلاشی اور نشاندہی کی جا سکتی ہے۔درخواست گزار کے وکیل نے کہا کہ یہ گرین نوٹس تھا نہ کہ ریڈ وارنٹ، اور ایف آئی اے کی رپورٹ میں ملزم کی گرفتاری کا ذکر نہیں تھا، جبکہ پولیس نے اسے گرفتار کیا تھا۔ ایڈیشنل ایڈووکیٹ جنرل نے بتایا کہ ملزم کو سیکشن 54 کے تحت گرفتار کیا گیا تھا اور پولیس کو مطلوب شخص کی گرفتاری کا اختیار سب سیکشن 7 کے تحت حاصل ہے۔عدالت عالیہ نے اس کیس کی مزید سماعت 25 مارچ تک ملتوی کرتے ہوئے جیل انتظامیہ اور ایف آئی اے سے ریکارڈ طلب کر لیا۔