سندھ حکومت کا ڈبل ڈیکر بسوں، طالبات و نوکری پیشہ خواتین سے متعلق بڑا اعلان

کراچی ( اباسین خبر)سندھ حکومت نے خواتین اور طالبات کی سہولت کے لیے اہم فیصلے کیے ہیں جن میں ڈبل ڈیکر بسوں کا چلانا اور پنک اسکوٹرز کی فراہمی شامل ہے۔سینئر صوبائی وزیر شرجیل انعام میمن نے ایک پریس کانفرنس میں کہا کہ سندھ کابینہ میں مختلف اہم فیصلے کیے گئے ہیں۔ ان فیصلوں میں ڈبل ڈیکر بسوں کی خریداری کی منظوری دی گئی ہے، اور اس کے ساتھ ہی خواتین اور طالبات کو پنک اسکوٹرز دینے کا بھی اعلان کیا گیا ہے۔ شرجیل میمن نے بتایا کہ جن خواتین کے پاس 2 ویلرز لائسنس ہوگا، انہیں اوپن بیلٹنگ کے ذریعے پنک اسکوٹرز فراہم کیے جائیں گے، اور ان خواتین کو بائیک چلانے کی تربیت بھی دی جائے گی۔شرجیل میمن نے مزید بتایا کہ سندھ حکومت کے پانی کے منصوبوں پر 1.6 ارب روپے خرچ کیے جا رہے ہیں، اور محکمہ توانائی 2 لاکھ گھروں کو سولر پلیٹس فراہم کر رہا ہے، جبکہ مزید 2.5 لاکھ گھروں کو سولر پلیٹس دی جائیں گی۔انہوں نے وزیراعظم شہباز شریف سے کراچی کے لیے 180 بسوں کے وعدے کی یاد دہانی بھی کرائی اور کہا کہ حکومت سندھ اس سلسلے میں وزیراعظم کو خط لکھے گی۔ان کے مطابق، پیپلز پارٹی خواتین کو خودمختار بنانے کے لیے ہمیشہ کام کرتی رہی ہے، اور یہ اقدامات خواتین کی زندگیوں کو آسان بنانے کے لیے کیے گئے ہیں۔فاروق ستار کے بارے میں بات کرتے ہوئے شرجیل میمن نے کہا کہ وہ چاہتے ہیں کہ ہم نفرت کی بات کریں، تاہم پیپلز پارٹی ہمیشہ عوامی مفاد میں کام کرتی ہے۔ انہوں نے کہا کہ فاروق ستار کو اسمبلی رکنیت سے استعفی دے کر دوبارہ الیکشن لڑنا چاہیے۔آخر میں، شرجیل میمن نے منشیات کے مسئلے کو اہمیت دی اور کہا کہ ہمارے معاشرے میں منشیات کی وجہ سے زومبیز پیدا ہو رہے ہیں، اور والدین کو اس مسئلے پر توجہ دینی چاہیے۔