ایم کیو ایم کا وزیراعلیٰ سندھ کو خط، پری بجٹ اجلاس بلانے کا مطالبہ

کراچی ( اباسین خبر)سندھ اسمبلی میں اپوزیشن لیڈر اور ایم کیو ایم کے رہنما علی خورشیدی نے وزیر اعلی سندھ کو ایک خط لکھ کر پری بجٹ اجلاس بلانے کا مطالبہ کیا ہے۔ایکسپریس نیوز کے مطابق علی خورشیدی نے اپنے خط میں کہا کہ سندھ اسمبلی میں پری بجٹ اجلاس فوری طور پر بلایا جائے کیونکہ سندھ اسمبلی کے قواعد کے مطابق جنوری سے مارچ تک پری بجٹ بحث ضروری ہے۔ انہوں نے مزید کہا کہ مالی سال کی شفاف منصوبہ بندی کے لیے اراکین اسمبلی کی مشاورت ضروری ہے، اور فروری کا مہینہ ختم ہونے کو ہے، لیکن سندھ حکومت نے ابھی تک پری بجٹ اجلاس طلب نہیں کیا۔علی خورشیدی نے کہا کہ حکومت سندھ قواعد کے مطابق فوری طور پر پری بجٹ اجلاس بلائے تاکہ اراکین اسمبلی کو بجٹ تجاویز پر اظہارِ خیال کا موقع مل سکے۔اپوزیشن لیڈر نے اس خط کی کاپی اسپیکر اور وزیر قانون کو بھی ارسال کی ہے تاکہ اس معاملے پر فوری کارروائی کی جا سکے۔