کراچی کے شہریوں کے استحصال میں وفاقی حکومت بھی قصوروار ہے: فاروق ستار

کراچی( اباسین خبر)متحدہ قومی موومنٹ (ایم کیو ایم) پاکستان کے رہنما ڈاکٹر فاروق ستار نے کہا ہے کہ کراچی کے شہریوں کے استحصال میں وفاقی حکومت بھی قصوروار ہے۔بہادر آباد میں ایم کیو ایم پاکستان کے مرکز پر پریس کانفرنس کرتے ہوئے فاروق ستار نے کہا کہ کراچی کے شہریوں کا استحصال ہوتا ہے اور وفاقی حکومت کا بھی اس میں حصہ ہے۔انہوں نے مزید کہا کہ 2016 کے بعد ایم کیو ایم سے بلدیاتی اداروں کی ذمہ داری جاگیرداروں کو دے دی گئی ہے۔ سندھ میں 16 سال سے بدترین اور بدعنوان حکمرانی جاری ہے، اس حوالے سے ایک وائٹ پیپر تیار کیا جا رہا ہے، جسے رمضان کے بعد شائع کیا جائے گا۔ایم کیو ایم کے رہنما کا کہنا تھا کہ کراچی میٹروپولیٹن کارپوریشن (کے ایم سی) کے ریٹائر ملازمین کے واجبات 2017 کے بعد سے ادا نہیں کیے گئے ہیں۔ 18 ویں ترمیم کے بعد ان واجبات کی ادائیگی صوبائی حکومت کی ذمہ داری ہے۔ انہوں نے یہ بھی کہا کہ کراچی کے 25 ٹانز نے ریٹائر ملازمین کو اپنی ذمہ داری تسلیم کرنے سے انکار کر دیا ہے۔فاروق ستار نے سوال کیا کہ ان شہری اداروں کے ملازمین کے ساتھ سوتیلی ماں کا سلوک کیوں کیا جا رہا ہے؟ انہوں نے یہ بھی الزام لگایا کہ ان کے کوٹے کے تحت بوگس ڈومیسائل والوں کو نوکریاں دی جا رہی ہیں، اور اگر ریٹائرمنٹ فنڈ کے پیسے کھا لیے گئے ہیں تو اس کی تحقیقات ہونی چاہئیں۔انہوں نے کہا کہ سندھ کے دیگر اضلاع کے لوگوں کو کراچی میں ڈومیسائل پر نوکریاں مل رہی ہیں، اور وزیرِ اعلی سندھ کی ذمہ داری ہے کہ یکساں قانون کا اطلاق ہو۔