پنجاب میں بلدیاتی انتخابات نہ کرانے کا اقدام لاہور ہائیکورٹ میں چیلنج

لاہور( اباسین خبر)پنجاب میں بلدیاتی انتخابات نہ کرانے کا اقدام لاہور ہائی کورٹ میں چیلنج کر دیا گیا۔جماعت اسلامی لاہور کے امیر ضیا الدین انصاری نے ایڈووکیٹ چودھری ذوالفقار علی کے ذریعے درخواست عدالت عالیہ میں دائر کی، جس میں وفاقی حکومت، الیکشن کمیشن اور دیگر اداروں کو فریق بنایا گیا ہے۔درخواست میں مقف اپنایا گیا ہے کہ پاکستان کے آئین کے مطابق لوکل گورنمنٹ کے انتخابات نہ کرانا احتساب اور مقامی حکمرانی کی روح کو مجروح کرتا ہے، اور مقامی حکومتوں کے انتخابات کی عدم موجودگی سے مقامی ذمہ داریوں کا خاتمہ ہو چکا ہے۔مزید کہا گیا کہ بلدیاتی انتخابات کے نہ ہونے کی وجہ سے انتظامی افراتفری، وسائل کی غلط تقسیم اور ترقی رک جانے جیسے مسائل سامنے آئے ہیں۔ درخواست میں کہا گیا کہ بلدیاتی انتخابات کے عدم انعقاد کی وجہ سے جاگیرداروں کا اثر و رسوخ بڑھا ہے جبکہ کمزور طبقہ مزید کمزور ہو رہا ہے۔درخواست میں استدعا کی گئی ہے کہ عدالت فریقین کو پنجاب میں 90 دن کے اندر بلدیاتی انتخابات کرانے کی ہدایت کرے، اور آئینی فرائض سے غفلت برتنے پر فریقین پر جرمانے عائد کیے جائیں۔