چیمپئنز ٹرافی: پاکستان اور بنگلا دیش کا بے معنی میچ بھی بارش کی نذر

راولپنڈی( سپورٹس ڈیسک)آئی سی سی چیمپئنز ٹرافی میں آج پاکستان اور بنگلہ دیش کے درمیان ہونے والا گروپ اے کا میچ بارش کی نذر ہو گیا۔راولپنڈی کرکٹ سٹیڈیم میں شیڈول گروپ اے کے میچ میں پاکستان اور بنگلہ دیش کی ٹیموں نے ایک دوسرے کے مدمقابل آنا تھا، تاہم بارش اور گیلی آٹ فیلڈ کے باعث ٹاس بھی نہ ہو سکا۔میچ کا ٹاس مقامی وقت کے مطابق دوپہر ڈیڑھ بجے ہونا تھا، جبکہ میچ دوپہر 2 بجے شروع ہونا تھا، مگر امپائرز نے فیلڈ کا جائزہ لینے کے بعد میچ کو منسوخ کر دیا اور دونوں ٹیموں کو ایک ایک پوائنٹ دے دیا گیا۔اس سے قبل راولپنڈی میں جنوبی افریقا اور آسٹریلیا کا میچ بھی بارش کے باعث ممکن نہیں ہو سکا تھا۔یاد رہے کہ پاکستان اور بنگلہ دیش پہلے ہی اپنے دو دو میچ ہار کر ایونٹ سے باہر ہو چکے ہیں، دونوں ٹیموں کو نیوزی لینڈ اور بھارت کے ہاتھوں شکست کا سامنا کرنا پڑا تھا۔گروپ اے میں بھارت اور نیوزی لینڈ پہلے ہی ٹورنامنٹ کے سیمی فائنل کے لیے کوالیفائی کر چکے ہیں۔