سوناکشی سنہا نے بالی ووڈ میں خود کو کام نہ ملنے کی وجہ بتادی

ممبئی ( شوبز ڈیسک)بالی ووڈ کے لیجنڈ اداکار شتروگھن سنہا کی بیٹی اور اداکارہ سوناکشی سنہا نے فلم انڈسٹری میں کام نہ ملنے کی وجہ پر بات کرتے ہوئے حیرت انگیز انکشاف کیے ہیں۔سوناکشی نے اپنے کیریئر کے ابتدائی دنوں میں وزن بڑھنے کی وجہ سے ہونے والی تنقید اور اس کے نتیجے میں کردار سے محرومی کا واقعہ شیئر کیا۔ انہوں نے بتایا کہ کس طرح ان کے جسمانی وزن پر کیے گئے تبصروں نے انہیں شدید متاثر کیا۔سوناکشی نے اپنے فلمی کیریئر کا آغاز دبنگ فلم سے کیا تھا، جس میں ان کی اداکاری اور خوبصورتی کو بہت سراہا گیا تھا، لیکن پھر بھی انہیں جسمانی خدوخال اور وزن کے حوالے سے تنقید کا سامنا کرنا پڑا۔ حالیہ انٹرویو میں سوناکشی نے ایک ایسا واقعہ ذکر کیا جب انہیں صرف وزن کی وجہ سے مرکزی کردار نہیں دیا گیا۔انہوں نے بتایا، مجھے یاد ہے کہ ایک بار میں واقعی ٹوٹ گئی تھی۔ میں روتے ہوئے گھر واپس آئی کیونکہ مجھے صرف اس لیے مرکزی کردار نہیں دیا گیا کہ میرا وزن زیادہ تھا۔سوناکشی نے مزید کہا کہ اس واقعے نے انہیں اتنا متاثر کیا کہ وہ خود سے سوال کرنے لگیں، خدا نے میرے ساتھ ایسا کیوں کیا؟ مجھے ایسا کیوں بنایا؟سوناکشی نے بتایا کہ اس وقت وہ اپنی ماسی کے پاس گئیں اور ان کی گود میں لپٹ کر رونے لگیں۔ انہوں نے کہا، میں جی بھر کر روئی، اور پھر اگلے دن دل ہلکا ہونے کے بعد سب کچھ ٹھیک لگنے لگا۔سوناکشی نے اس بات پر زور دیا کہ اس تجربے نے انہیں بہت کچھ سکھایا اور اب وہ اپنی خود اعتمادی کو کسی بھی تنقید سے بالاتر سمجھتی ہیں۔