کوئی صوبائی حکومت بلدیاتی انتخابات کروانے کیلئے تیارنہیں: چیف الیکشن کمشنر

اسلام آباد( اباسین خبر)چیف الیکشن کمشنر سکندر سلطان نے کہا ہے کہ بدقسمتی سے کوئی بھی صوبائی حکومت بلدیاتی انتخابات کروانے کے لیے تیار نہیں۔الیکشن کمیشن میں پنجاب میں بلدیاتی انتخابات کے انعقاد سے متعلق سماعت کے دوران، چیف الیکشن کمشنر نے پنجاب حکومت کو فوری طور پر انتخابات یقینی بنانے کے لیے قانون سازی مکمل کرنے کا حکم دیا۔دوران سماعت، سکندر سلطان نے کہا کہ جب بھی الیکشن کمیشن اپنی تیاری مکمل کرتا ہے، صوبائی حکومتیں قوانین میں ترامیم کر دیتی ہیں، اور بدقسمتی سے کوئی بھی صوبائی حکومت بلدیاتی انتخابات کے انعقاد کے لیے تیار نہیں ہے۔سیکرٹری الیکشن کمیشن نے مقف اختیار کیا کہ صوبے نے پانچ مرتبہ انتخابی قوانین تبدیل کیے، اور شیڈول کے باوجود صوبے میں بلدیاتی انتخابات منعقد نہ ہو سکے۔چیف سیکرٹری پنجاب نے کہا کہ جیسے ہی قانون سازی مکمل ہو جائے گی، قانون کے تحت رولز تیار کر لیے جائیں گے، اور پنجاب حکومت بلدیاتی انتخابات کے انعقاد کے لیے مکمل تعاون کرنے کے لیے تیار ہے۔