معروف امریکی اداکارہ 39 سال کی عمر میں چل بسیں

نیویارک( شوبز ڈیسک)معروف امریکی اداکارہ مشیل ٹریچٹن برگ 39 سال کی عمر میں انتقال کر گئیں۔ مشیل ٹریچٹن برگ بفی دی ویمپائر سلیئر اور گوسپ گرل جیسے مشہور ڈراموں میں اپنی شاندار کارکردگی کے لیے جانی جاتی تھیں۔پولیس کے مطابق، بدھ کی صبح 8 بجے نیویارک سٹی میں ان کے اپارٹمنٹ سے ایمرجنسی کال موصول ہوئی، جہاں انہیں بے ہوش پایا گیا۔ طبی عملے نے موقع پر ہی ان کی موت کی تصدیق کر دی، اور ابتدائی تحقیقات کے مطابق کسی مجرمانہ سرگرمی کا شبہ نہیں ہے۔ذرائع کے مطابق، مشیل نے حال ہی میں جگر کی پیوند کاری کروائی تھی اور ممکن ہے کہ ان کی موت قدرتی وجوہات کی بنا پر ہوئی ہو، تاہم موت کی حتمی وجہ جاننے کے لیے طبی معائنہ جاری ہے۔اداکارہ کی اچانک موت پر ساتھی فنکاروں اور دوستوں نے گہرے دکھ کا اظہار کیا ہے۔ گوسپ گرل میں ان کے ساتھی اداکار ایڈ ویسٹ وِک نے انسٹاگرام پر اپنے جذبات کا اظہار کرتے ہوئے کہا کہ یہ بہت افسوس ناک خبر ہے۔مشیل ٹریچٹن برگ نے 3 سال کی عمر میں اپنے کیریئر کا آغاز کیا اور دی ایڈونچرز آف پیٹ اینڈ پیٹ اور آل مائی چلڈرن جیسے شوز میں کام کیا۔ 1996 میں انہوں نے ہیریئٹ دی اسپائی میں مرکزی کردار ادا کیا۔ 2000 سے 2003 تک وہ بفی دی ویمپائر سلیئر میں ڈان سمرز کے کردار میں نظر آئیں، جبکہ گوسپ گرل میں انہوں نے جارجینا اسپرکس کا کردار نبھایا۔