اسلام آباد( اباسین خبر)وزیراعظم شہباز شریف نے کہا ہے کہ مقدمات کی تفویض اور انتظامی نظام سے بدعنوانی کی نذر ہونے والا پیسہ دوبارہ خزانے میں واپس آئے گا۔وزیراعظم نے مقدمات کی تفویض اور انتظام کا جدید نظام متعارف کرادیا، اور اس پر وزیر قانون اور ان کی ٹیم کو مبارکباد دی۔شہباز شریف نے کہا کہ نیا نظام شفافیت اور بروقت انصاف کی فراہمی میں اہم کردار ادا کرے گا، اور یہ وقت کا تقاضا تھا۔ جدید ٹیکنالوجی سے لیس یہ نظام مقدمات کے ٹریک اینڈ ٹریس میں معاون ثابت ہوگا۔انہوں نے مزید کہا کہ پاکستان بھر میں سائلین اور درخواست گزار شفاف اور تیز انصاف کے خواہاں تھے، اور ایف بی آر میں ٹریک اینڈ ٹریس سسٹم کا مقصد واجب الادا ٹیکس کا حصول تھا، تاہم بدقسمتی سے ماضی میں اس سسٹم کا درست استعمال نہیں کیا گیا۔شہباز شریف نے بتایا کہ کئی دہائیوں سے ہمارا نظام انحطاط کا شکار رہا اور جدید ٹیکنالوجی کی کمی سے کھربوں روپے کی رقم دہائیوں تک رکی رہی۔ انہوں نے کہا کہ گزشتہ 11 ماہ میں خامیوں کو دور کرنے پر پوری توجہ دی گئی۔وزیراعظم نے کہا کہ ٹریبونلز، ہائی کورٹس اور سپریم کورٹ میں زیر التوا کھربوں روپے کے مقدمات کا فیصلہ کیا جائے گا اور اس نئے ٹریک اینڈ ٹریس سسٹم سے بدعنوانی کی نذر ہونے والا پیسہ خزانے میں واپس لایا جائے گا۔انہوں نے کہا کہ بدعنوان عناصر سے ایک ایک پائی وصول کر کے عوامی فلاح پر خرچ کی جائے گی، اور یہ رقم اب قومی خزانے میں جمع ہوگی۔وزیراعظم نے کہا کہ گزرے وقت پر افسوس کرنے کی بجائے اس سے سیکھتے ہوئے آگے بڑھنا ہے، اور ٹیم کی محنت کے مثبت نتائج سامنے آ رہے ہیں۔
جدید نظام سے بدعنوانی کی نذر ہونیوالا پیسہ دوبارہ خزانے میں آئیگا: وزیراعظم
5
